FIKREMARKOS DESTA ፍቅረማርቆስ ደስታ

አንጋፋው ደራሲ ፍቅረማርቆስ ደስታ የሐመር ሕዝብ ባህል ላይ ባተኮሩት እጅግ ተወዳጅ በሆኑት ተከታታይ ‘ኤትኖግራፊክ’ ልብወለድ ድርሰቶቹ ይታወቃል። አሁን ደግሞ “የሚሳም ተራራ” የተሰኘ ድንቅ መጽሐፉን ለበርካታ ዓመታት በጉጉት ሲጠብቁ ለነበሩት አንባቢዎቹ ይዞ ቀርቧል። በዚህም የግለታሪክ መጽሐፉ ፍቅረማርቆስ የሕይወት ጉዞውን ትዕይንታዊ በሆነ ውብ ቋንቋ በመተረክ የትዝታ ብልጭታዎቹን (ከኢትዮጵያ እስከ አሜሪካ፣ ከልጅነት እስከ ጐልማሳነት) ሳይሰስት ያጋራል።

ፍቅረማርቆስ በአንባቢዎች እስከዛሬ ከፍተኛ አድናቆትን ያስገኘለትን ከቡስካ በስተጀርባ የተሰኘውን የበኩር ድርሰቱን በ1987 መጀመሪያ ለንባብ አብቅቷል። ከዛም በተከታታይ ተወዳጅ ልብወለድ ድርሰቶቹን – “ኢቫንጋዲ” (1990 ዓ.ም) እና “የዘርሲዎች ፍቅር” (1991 ዓ.ም) አሳተመ። መጽሐፎቹም በርካታ የአገር አቀፍ ሽልማቶች አሸናፊ ሆነዋል።

በሚቀጥሉት አመታትም አትኩሮቱን ከደቡብ ኦሞ በማዞር “አቻሜ” (1992 ዓ.ም) እና “የንሥር ዐይን” (1993 ዓ.ም) የተሰኙ ታሪካዊ ልቦለዶቹን ለአንባቢዎቹ አቀረበ። “Land of the Yellow Bull” (1995 ዓ.ም) የተሰኘ የእንግሊዘኛ ልብወለድም አሳትሟል። ከዚህ ባሻገርም “ጃገማ ኬሎ – የበጋው መብረቅ” (2001 ዓ.ም) በሚል ርእስ የጀግናው አርበኛን የሕይወት ታሪክ በተለመደው ውብ ትረካው አስነብቦናል። በደቡብ ኦሞ ላይ በሚያተኩሩ ዶኩሜንተሪ ፊልሞች – “Becoming a Man in Africa” (2005) እና “Black Samurai” (2006) ላይም ተሳትፏል።